Տոքթոր Մայքըլ Մոսլի յօդուած մը գրած է Daily Mailին համար, ուր բացատրած է, թէ ինչո՞ւ ամբողջական նախաճաշը եւ «համեստ» ընթրիքը կարեւոր են օրկանիզմին համար։
Մասնագէտին խօսքով՝ այդ ձեւով աւելի քալորիներ կ՛այրուին եւ կը բարելաւուի «մեթապոլիզմ»ը։
Միաժամանակ՝ Ապըրտինի համալսարանի վերջերս Cell Metabolism ամսագրին մէջ հրապարակուած հետազօտութիւնը ցոյց տուած է, որ սնունդ ստանալու ժամանակ, (որքան ալ զարմանալի է) առանձնակի նշանակութիւն չունի, թէ որքան քալորիներ կ՛այրուին եւ որքան լաւ մեր օրկանիզմը կ՛իւրացնէ շաքարն ու ճարպը, որոնք կը գտնուին նոր կերած սնունդին մէջ։
Գիտնականներու տրամադրած սնունդը ունեցած է սպիտակուցի բարձր եւ ածխածիններու համեմատաբար ցած պարունակութիւն (քալորիներու 30 առ հարիւրը ստացուած է սպիտակուցէն, 35 առ հարիւրը՝ ածխածիններէն եւ 35 առ հարիւրը՝ ճարպերէն)։
Վերահսկուող եւ սպիտակուցներու բարձր պարունակութեամբ սննդականոն ունենալով՝ կամաւորները կորսնցուցած են իրենց կշիռքին զգալի մասը, մասամբ այն պատճառով, որ մեծ քանակութեամբ սպիտակուցի օգտագործումը օգնած է կշտանալու՝ նուազեցնելով անօթութեան «կրելին հորմոն»ի մակարդակը։
Բայց անոնք կշիռքը նոյնքան արագ կորսնցուցած են՝ անկախ անկէ, թէ ամբողջական նախաճաշ ստացա՞ծ են, թէ՝ յագեցած ընթրիք։ Ոչ մէկ տարբերութիւն եղած է նաեւ, երբ խօսքը արեան մէջ շաքարի մակարդակի մասին եղած է, որ նոյն ձեւով բարելաւուած է՝ անկախ սննդականոնի տեսակէն։
Միակ իսկական տարբերութիւնը այն եղած է, որ ամբողջական նախաճաշ ընելով, անոնք իրենք զիրենք աւելի քիչ անօթի զգացած են օրուան ընթացքին, քան ամբողջական ընթրիք ընելով։
Այլ հետազօտութիւն մը եւս, որ կատարուած է 2013 թուականին Թել Ավիվի համասլարանին մէջ 93 կիներու մասնակցութեամբ, որոնք աւելորդ կշիռք ունեցած են եւ արեան մէջ շաքարի բարձր մակարդակ, ցոյց տուած է, որ անոնք, որոնք ամբողջական նախաճաշ ստացած են, մօտաւորապէս 2,5 անգամ աւելի կշիռք կորսնցուցած են (միջինը 8,7 քիլոկրամ), քան անոնք, որոնք ամբողջական ընթրիք ըրած են (միջինը 3,6 քիլոկրամ)։
Բժիշկին կարծիքով՝ կշիռքը պահելու լաւագոյն միջոցը սպիտակուցով հարուստ նախաճաշն է։ Միաժամանակ՝ ան յանձնարարած է խուսափիլ երեկոյեան ուտելէն, մանաւանդ երբ ատիկա կ՛ըլլայ առանց մտածելու։
